MARUISM

Mga Kwentong Parlor Ni Wanda Ilusyunada

Ang librong ito ay Rated PG. Pa-Gurl. Ito ay koleksyon ng mga kwentong parlor tungkol sa pakikipagsapalaran ni Wanda Ilusyunada sa mundong in need for a total makeover. Sa gitna ng mga split ends at patay na kuko ay mga eksenang kabaklaan at panggu-goodtime, mga pang-o-okray at mga chenelyn bangungot sa buhay. Pwede kang matuwa, pwede ka ring mag inarte. Pero chikka lang. Ganyan si Wanda, ang pink sheep ng pamilya! Saving the world one chakka at a time bago man lang rumampa.

 

O hayan ha, namasahe pa ako sa eropleyn ng libo-libong pesoses mula Mindanao papuntang Manila para lang bumili lang ng bookleta mo na itech. Hehehe! Charooz!

Siempre pagdating ko ng Manila go ako agad sa pinakamalapit na National Bookstore . Una ko pinuntahan eh yung NBS-Ever Gotesco sa Ortigas Extn kasi malapit lang sa amin kaso wa pa daw sila abelabol. Natandaan ko sinabi mo sa shoutbox ng blog mo na sa Makati sigurado meron dun. Tama ka bakla, sa NBS-Glorietta ko nga sya natagpuan. Kabog!

Di naman ako nahirapan hanapin ang libro mo. Alam mo ba kung bakit? Itanong mo bilis!!! Nandun siya sa kababuyan! Bwahaha! Kasama nya ang sandamakmak na mga booklets na Pugad-Baboy ni Pol Medina Jr. Pero angat ang pink book mo dun, bakla! Nagmukha ka ngang muse sa gitna ng mga oink oink. Wahihi! O di ba? Sensya na at feeling-close ako sa yo kahit dehins mo ko kilala. Humahanga lang po.

Last year, yung Kwentong-Tambay book naman ni blogger Batjay ang hinanap ko. Josko! Ilang NBS branches din ang sinuyod ko bago ako nakabili. Finally, bago nagsilabasan ang mga varicose ko sa binti sa kalalakad sa mga malls, nakabili din ako ng libro ni Batjay sa NBS- SM Mall of Asia. I bought 2 pcs. at pinadala ko yung isa sa ka-chat kong nasa Canada.

Ewan ko, pero natutuwa ako tuwing nalalaman ko na yung mga blogs ng mga hinahangaan ko at sinusubaybayan eh nagkakaroon na rin ng libro. O di ba, di man nila ako kilala at di ko man sila close at kahit lurker lang ako lagi sa blog nila – proud ako para sa kanila. At bilang suporta siempre, go and buy ako ng mga books nila. Si Bob Ong nga daw ay nagsimula as a blogger din yata.

Di ako magtataka kung si Badoodles eh magkaroon na rin ng libro balang araw. Magaling din kasi magsulat.

Yung book ni Wanda ay nagkakahalaga lang ng P85 kaya hindi masakit sa bulsa. P85 lang pero yung hagikhik at saya na binigay sa akin ay worth P85 thousand pesoses naman. Priceless nga kung tutuusin. Ibang klase humor ni Wanda kumpara dun sa ibang bakla – pang-masa pero intelihente. Isang baklang parlorista na above average ang talino. Since aminado akong isang jologs siempre relate na relate ako.

Kesa naman bumili ako ng mga nosebleed na pocketbooks o kaya gaya ng Harry Potter book na daan-daang piso pa ang halaga tapos di naman ako nakaka-relate at di naman ako matawa, Sus wag na noh! Am not against HP books, fan ang junakis kong si Kevin ng HP books. Pero siempre kanya-kanyang trip yan.

Itatanong nyo kung may kapupulutan ba ng aral ang mga laman ng bokleta ni Wanda? Eh depende na yun sa pananaw ng reader. Kung nakaka-intindi ka ng sward lingo eh pasok ka sa banga. Tsaka aral ba kamo? Kung aral din lang pag uusapan, sa dinami-dami ng mga pangyayari at napagdaanan ko sa buhay … di ko na siguro kelangan ang libro para LANG makapulot ng aral.

Ngayon mas pinag-aaksayahan ko ng panahon yung mga bagay na pwede ko ikasiya o makapag-patawa sa akin. Gusto ko madagdagan ang humor ko araw-araw. Mas masarap dumikit sa mga taong magaling magpatawa eh. OK pa sa olrayt ang magkaroon ng mga kaibigan na game sa kulitan at tawanan. Mas nakakagaan ng dibdib ang makabasa ng SMS jokes galing sa kanila. Masabihan man na mababaw akong tao o baduy, kever ko!

Kaya mas pipiliin kong basahin ang mga blogs na may mga nakakatawang entries kesa dun sa mga seryosohan gaya ng temang-politika. Sobra-sobra na nga ang dramatology ng buhay ko tapos pabibigatin ko pa ba loob ko sa kababasa ng tungkol sa politika ng Pilipinas o ng buong mundo?

Sobrang dami na ng komplikasyon sa pamumuhay ngayon kaya kelangan madiskarte ka. Marami ang nagtatanong kung papano ko nakakayanan mag isa ang bigat o hirap ng pagiging single-mom at pagpapalaki ng dalawang anak. Eto po ang isa sa mga diskarte at sikreto ko – HUMOR. Dagdag lang ako ng dagdag ng mga katatawanan sa isip ko. Sa ganitong paraan man lang ay napapagaan ang loob ko araw-araw kahit nasa gitna ako ng problema.

Humor… kung wala o kulang ka neto, malamang isang araw ay isa ka sa mababalitaan kong tinitingala na rin. Tinitingalang nakabigti o kaya tiningala dahil umakyat sa pinakamataas na billboard sa Edsa-Kamuning para tumalon o magpakamatay.

Maraming salamat Wanda sa katatawanang hatid ng mga kwentong-parlor mo. Aabangan ko yung Book 2 mo, pramis!

Tags: Batjay. Kwentong Tambay, Kwentong Parlor Ni Wanda Ilusyunada, my books