May email subscription ako sa isang Yahoogroup na itatago na lang natin sa pangalan na Lovenotes. Yup, member nga ako ng Yahoogroup na Lovenotes dahil idol ko na talaga mula pa nung 80′s si Dear Joe (Joe D’ Mango) at hindi si Dear Jones. Paminsan-minsan, ginagawa kong aliwan ang pagbabasa ng mga emails tungkol sa mga hinaing sa puso ng ibang tao kasabay na rin ang pag hingi nila ng advices sa members ng grupo. Pero ni minsan hindi ako nakisabat sa mga balitaktakan nila sa kadahilanan na halos 95% ng paraan ng mga nagsusulat ay text lingo ang gamit.

Eto ang sampol ng isang member na humihingi ng payo:

Matagal na ako nagtitimpi. Hindi naman sa nang-aanu ako. Pasintabi lang po sa mga tatamaan wag po sanang magagalit dahil sa ganang akin po lamang itetch. Pero may tamang oras at wastong lugar ang lahat ng bagay.

Kung sa selpon ko matatanggap ang ganitong klaseng pananalita ay ok lang at hindi ko na kelangan ipaliwanag kung bakit. Naiintindihan natin lahat na kelangan magbawas ng vowel sa mga words na ite-text.

Pero dun sa mga bagong pautot na pagta tayp ng salita, ay! di ko talaga keri. Di ko pa rin maiwasan ang mapakamot ng ulo tuwing nagbabasa ng mga imbentong shortcut. Iniisip ko kasi na mas nakakabobo ang ganun kasi makakasanayan natin ang mali. Kahit sa mga anak ko…gusto ko silang sitahin at itama ang pag ti-text nila at nag aaalala ako na makasanayan nila ang ganun at madala hanggang sa iskul. Paano na lang pag pinagsulat sila ng isang “formal theme” sa Pilipino subject nila? Nag-aalala ako sa MAKAKASANAYAN.

Iko-kowt ko ang sabi ng isang kaibigan sa selpon ko:

“wala naman turo na panitikan pilipino na ang “ako” at “ko” ay pwedeng “q” ang kapalit. ang totoo nyan, di nga kabilang ang letrang “q” sa alpabetong pilipino.”

Koreeeeek!

Ok, sabihin na natin na yan ang uso at isang epekto na dala ng makabagong paggamit ng technology. Pero sana nga lang piliin natin at sumunod sa uso kung saan tama at nakakabuti rin. Sa chat, tamad ako mag reply sa mga nagmi-message sa akin pero mas lalo akong tamad sumagot pag nakikita ko na nagta type na text lingo ang gamit. Hindi talaga kaaya-aya basahin at never ko matatanggap na “cool” ang ganitong messaging sa chat o email.

P.S.

Miney dear, abswelto ka sa entry ko na to dahil sa simpleng rason na – labs kita at tanggap kita. Lols.